Nauubos rin pala ang balon ng salita. Ang mga talinghaga’y 
napupudpod kung mag-isa kang naglalakad sa daan

o napapagod kung mag-isa kang lumilipad sa kalawakan ng kawalan.
Kung hindi man unti-unti o dahan-dahan,

sabay-sabay nagluluksa ang mga pangarap
habang nagsasaya ang iyong mga tala.

Kaya nang tanungin mo ako kung saan ko ba itinali,
itinago ang salita, wala nang pulang rosas na lumabas

sa bibig. Tuyot na ang mga bulaklak sa gunita.

20 Oktubre 2007
Al-Khobar, Kingdom of Saudi Arabia